حبِّة تَذَاكِر ورق

بقلم /اسماء كامل

بقايا لذكرى من مشاوير

وجري وسعي ع الفاضي

وأعمارنا اللي فيه بتطير

ورامية حمولها ع القاضي

وماشيين فيها بالجُملة

بنتصبَّح بكام جُملة

على عُملة من الورق بايشة

وكف العمر كله شقوق

وأيامه ماهيش عايشة

سنين طايشة..

بتبني فوق جذور الروح

كباري من الندم والذل

وترمي فوق سنينَّا حطام

يغرق سعينا في المُر

وعادي ..

يفوت برضه الزمن ويمُر

وفيه الخطوة زرعانا

وخلعانا من الشكوى

رمت في نفوسنا كتلِة صبر

وملفوفة بـ ١٠٠ فجوة

ومشحونة بلامبالاه

محدش عنده طاقة يقوم

ويصرخ تاني على ليلاه

بقت معاناه ..

سنينها اتغلِّفت بالخوف

ولا بنسمع ولا بنشوف

وكل الغُلب متوقَّع

وأحزاننَّا بقت واقِع

وأوقَع م اللي نحلم بيه

وفي إيه تاني هانخبِّيه!

وهيّ الأزمة مكشوفة

وآخرتهـا ومعروفة

إيدين مابقتش مكسوفة

تمدلنا بواقي الظلم

ورافعة فـ راية العافية

وفـ العافية ترُش السِّم

بقينا نلِم..

في أيّامنا من الطوابير

ونسعى ونجري ونلَملِم

تذاكِر ذكرى للمشاوير.